कविता : आई

या वाळवंटात तुझी आठवण येते खूप आई
वाळूच्या कणाकणात दिसते तुझेच रूप आई

तुझ्या पुरण पोळीचा दरवळ आठवतो तेंव्हा
स्वप्नातही दोन चमचे जास्त वाढतेस तूप आई

दिवाळीचे खमंग फराळ संपून जायचे तेंव्हा
लपवून ठेवलेले लाडू द्यायचीस गुपचूप आई

खोड्यांना वैतागून शेजारी तक्रारीला यायचे तेंव्हा
माहित असुनही तोंडाला लावायचीस कुलूप आई

पावसात खेळून खेळून आजारी पडायचो तेंव्हा
हुरड्याच्या पीठाचे बनवून द्यायचीस सूप आई