पाणी आहे खूप
गावाच्या नदीला
मंदिराच्या बारवेला
रानातल्या विहीरीला
दगडाच्या खाणीला
उठ मित्रा उठ! चल जाऊ पोहायला
गवताची गर्दी झालीयं
रानातली पिकं वाढलीयं
मकाला कणसं आलीयं
लपायला जागा झालीयं
बोरं पिकलीत झाडाला
उठ मित्रा उठ! चल जाऊ पोहायला
शाळेला दांडी मारू
गुपचूप खाणीवर जाऊ
दुपारच्या सुट्टीत ऊस खाऊ
दप्तर लपवून ठेवू
कपडे लटकून झाडाला
उठ मित्रा उठ! चल जाऊ पोहायला
दगडाचा ठाव आणू
पाण्यात धराधरी खेळू
दोघात शर्यत लावू
पोहण्याची मज्जा लुटू
भांडणे ठेवून बाजूला
उठ मित्रा उठ! चल जाऊ पोहायला
उन्हात बसून चड्डी वाळवू
दुपारनंतर मुलांसोबत निघू
त्यांच्याकडून वर्गपाठ मिळवू
घरी जाऊन अभ्यास करू
पण सांगायचे नाही कोणाला
उठ मित्रा उठ! चल जाऊ पोहायला
कोणत्याही टिप्पण्या नाहीत:
टिप्पणी पोस्ट करा