कविता : धुके

आजही छान धुके पडले आहे. मेट्रोतून ऑफीसात येतांना त्या धुक्याची सफेद चादर पाहुन सुचलेल्या ताज्या ताज्या ओळी...

धुके

धुके आज पडले किती किती छान
रस्त्यावर लांब लांब मोटारीची रांग
चालक दादा चालक दादा हळू हळू
हाक तुझी गाडी नको फार पळू

सावकाश चल दूरचे काही दिसतय का?
नको काढू फोटो मन स्वस्त बसतय का?
चालक दादा चालक दादा हळू हळू
पोलिसची गाडी मागे नको फार पळू

लाव मोटारीचे लाल लाल इंडिकेटर
मागच्यांना कळू दे पुढे आहे मोटर
चालक दादा चालक दादा हळू हळू
शाळा आहे पुढे नको फार पळू

एक दिवस उशीर झाला तरी चालेल
कामावर तुला आज कोण नाही बोलेल
चालक दादा चालक दादा हळू हळू
तुझ्या घरी छोटे बाळ नको फार पळू

~ गणेश

कविता : माझी फुलबाग

वाडग्याच्या एका कोपर्‍यात
जिथं आजूबाजूला होते
एक भले मोठं चिंचेचे झाड
कडब्याच्या गंजी, गायींचा गोठा  
शेणाचा उकिरडा, सरपणाचे फास
चिपाटाचे ढिगल, भुसारा
आणि अजूनही बरच काही...

तिथंच एका छोट्याशा जागेत
होती एक माझी फुलबाग
जीवापाड जपलेली आणि
मेहनतीने फुलवलेली
माझ्या बागेत होती नानाविध फुलझाडं
मोगरा, प्राजक्त, झेंडू, सदाफुली, गोकर्ण, जास्वंद
कर्दळी, काटेकोरंटी, शेवंती, रूई आणि निशिगंध
गणेश वेल, जाईजुईचे वेल तर चौफेर पसरायचे
फुलझाडां व्यतिरिक्त असायचा भाजीपाला
शेवगा, पपई, वांगी आणि मिरची

शाळा सुटली की मी बागेकडे धाव घेई
झाडांना पाणी घाली
कितीदा शेणखतचा डोस देई
सुट्टीच्या दिवशी तर मी बागेतच रमायचो 
कळ्या फुलांवर अलगद हाथ फिरवायचो
फुललेल्या फुलांचा सुगंध घ्यायचो
रंगीबेरंगी फुले पाहुण फार आनंदात जगायचो
झाडांची काळजी घेण्यातच मग सुट्टी संपत असे

माझी फुलबाग अनुभवायची
वर्षाचे सारे सण आणि उत्सव
गणपतीच्या आरतीचा हार
नवरात्रातील फुलांची माळ
दसरा दिवाळीला झेंडूचा हार
शनीला रूईच्या पानाफुलांचा हार
महादेवाला गोकर्ण चा हार

ताई बनवायची मोगर्‍याचा गजरा
प्राजक्ताची फुले वेचायला तर
गल्लीतल्या मुली पहाटेच जमायच्या
फुलासाठी भांडण खेळायच्या

वर्षामागून वर्ष गेली
बालपण सरले 
शाळा शिक्षण पुर्ण झाले
नोकरी लागली
घर बदललं
गोठाही मोडला
गावापासून खूप दूर आलो
माझी फुलबाग तोपर्यंत सुकून गेली

आज जेंव्हा जुन्या वाडग्यात जातो
फुलबागेची जागा ओसाड दिसते
कधी काळी जिथं फुलं फुलली
तिथं खाचखळगे पडलेत
प्राजक्ताच झाड तेव्हढ आहे
नियतीच्या पावसाळ्यावर तग धरून
प्रेमाने पाणी घालणारं
फुलासाठी भांडणं खेळणारं
आज तिथं कुणी कुणी नाही

माझ्या फुलबागेची जागा बघीतली की,
परत एकदा मला बाग फुलवावी वाटते
पण कधी?
आयुष्याच्या उतारावर कधीतरी
वेळ मिळेलच.....

~ गणेश

शब्दार्थ :
१. वाडगं - जनावरांचा गोठा, शेतीचे आवजारे, वैरणसाठी असलेली जागा
२. सरपणाचे फास - रचून ठेवलेले सरपण
३. भुसारा - मळणी यंत्रातून धान्य निघाल्यानंतर बाकी राहिलेला भूसा साठवलेले ठिकाण