सुषमा मुंढे आणि एकाच हश्या......
गोपीनाथ मुंढे हे राजकीय विनोद करण्यात आणि आपल्या खास शैलीत चिमटे काढण्यासाठी प्रसिद्ध होते. एकदा असाच एक विनोद मुंढे साहेबांच्याच अंगलट आला. १९९८ सालातील घटना आहे. स्वर्गीय प्रमोद महाजन केंद्रीय सूचना आणि प्रसारण मंत्री होते. त्यावेळी राज्यात युतीचे राज्य होते आणि गोपीनाथ मुंढे उप मुख्यमंत्री तर शिवसेनेचे प्रमोद नवलकर सांस्कृतिक कार्य मंत्री होते. दूरदर्शनच्या एका छोटेखानी कार्यक्रमात मुंढे साहेबांना आमंत्रित केले होते तर प्रमुख पाहुणे हे अर्थातच केंद्रीय सूचना आणि प्रसारण मंत्री प्रमोद महाजन हे होते.
मुंढे साहेबांनी भाषणाला सुरुवात चिमटा काढूनच केली.
"मला असे वाटते आहे कि मी पण माझे नाव बदलून प्रमोद मुंढे ठेवू. कारण दूरदर्शन वाल्यांना प्रमोद नावाच्या लोकांशिवाय दुसरे कोणी दिसताच नाही"
सभागृहात एकच हश्या पिकला. प्रमोद महाजन काय चिमटे काढण्यात कमी नव्हते. जेव्हा महाजन साहेबांची बारी आली त्यावेळी त्यांनीही स्वतःच्या शैलीत मुंढे यांना उत्तर दिले.
"जर केंद्रीय सूचना आणि प्रसारण मंत्र्याचे नाव स्वतः पुढे लावल्याने दूरदर्शन वर प्रसिद्धी मिळणार असेल, असे मुंढे साहेबांना वाटत असेल तर ते एक गोष्ट विसरत आहेत कि मी आत्ताच काही दिवसापूर्वी या मंत्रालयाचा पदभार स्वकारला आहे. माझ्या आधी या मंत्रालयाच्या सुषमा जी मंत्री होत्या. मुंढे साहेबांनी स्वतःचे नामकरण प्रमोद मुंढे न करता सुषमा मुंढे केल्यास दूरदर्शन नक्कीच प्रसिद्धी देईल"
आणि सभागृहात परत जोरदार हश्या पिकला .......
- गणेश पोटफोडे
