सरज्या राज्याची गाडी
गाडी चालली चालली खालच्या मळ्यात
वाजते घुंगरु सरज्या राज्याच्या गळ्यात
डौलाने ओढती गाडी ही खिल्लार जोड
साऱ्या गावात नाही माझ्या बैलास तोड
वाट वाकडी तिकडी तरी चालती चाकं
माझ्या बैलास नाही कधी चाबकाचा धाकं
नानाभाऊ गाडीवान भरे वगंण आखात
कशी धावती गाडी तिचे जीवन चाकात
वाजे वाजे घुंगरु समदं शिवार डोलतं
कामावरल्या बायांना ते वखूत सांगतं
निघाली हो गाडी हिरव्या चाऱ्याने भरली
गोठ्यातली गाय साटं बघून हंबरली
लाभली ही जोड साता जन्माची पुण्याई
सरज्या राज्याने बघा पिकवली काळी आई
कुठे पांग फेडू सांगा कोणत्या देवळा?
पुढच्या जन्मी गळ्यात बांधीन मी शिवळा
~ गणेश
